Радио и телевизија Црна Гора (РТЦГ) ексклузивно објави аудио снимка од комуникацијата на шефот на Безбедносниот центар во Подгорица, Горан Јокиќ, кој преку радио врска ги предупредува припадниците на полицијата дека за време на протестот се слушаат рафали на барикадата на Белведере во Цетиње на 5 септември и им кажува да пристапат кон процедурите за заштита во ситуации при евентуално отворање оган.
До ексклузивната снимка РТЦГ дојде по информацијата дека огнено оружје било употребено на Белведере од страна на граѓани кои биле против устоличувањето на митрополитот Јоаникије во манастирот на Цетиње.
На снимката се слушаат истрели од огнено оружје и пиротехника.
Јокиќ ја предводеше акцијата за деблокирање на Белведере.
Аудио снимката е во сопственост на полициската управа и ќе биде предмет на истрага.
РТЦГ дознава дека полицијата работи на идентификација на лицата кои пукале за време на полициската акција на 5 септември.
Дел од граѓаните, кои се спротивставија на устоличувањето на Јоаникије во манастирот Цетиње, формираа барикада на Белведере, на патот Подгорица-Цетиње, на 4 септември. Приодите кон главниот град, од правец на Подгорица и Будва, беа блокирани од демонстранти со цел да го спречат доаѓањето на патријархот Порфириј и свештенството на Српската православна црква во главниот град.
Во неделата, 5 септември, ТВЦГ и РТЦГ објавија дека на барикадата на Белведере се користело огнено оружје, истакнувајќи дека информацијата е официјално потврдена.