Македонскиот вицепрвак Металург попладнево загуби со 1:0 од Карабах во првиот дуел од 1.коло во квалификациите за Лига Европа.
Иако „Металурзите“ најавуваа реванш за елиминацијата пред три години од денешниот противник тоа не се случи, барем не на арената „Филип Втори“ во Скопје.
Гостите од Азербејџан заслужено остварија предност пред реваншот на нивниот терен во Баку закажан за 11 јули.
Победничкиот гол Карабах го постигна по акцијата на двајцата Бразилци во нивните редови во 65.минута кога Рејналдо го совлада младиот Андреа Ефремов, најдобриот поединец во составот од „Автокоманда“.
И македонскиот претставник имаше неколку шанси за гол од кои две посериозни, но еднаш беше погодена гредата, а еднаш неспретно реагираше Чурлинов.
Останува Металург да чека нова шанса за прва победа на европска сцена. Во досегашните девет меча во евро-куповите „зелените“ немаат ниту еден триумф.