Центарот за култура „Трајко Прокопиев“ поведе иницијатива и ги покани младите активистите, уметници да се пријават и со логистика на националната установа да се презентираат проектите пред јавноста, соопштија денеска надлежните од центарот.
– Одлучивме да поведеме „културна иницијатива“ ги покануваме младите кои имаат афинитет кон уметноста да дојдат, да поразговараме да понудат идеја, ние ќе понудиме логистика, луѓе, опрема сè што можеме пред платото да организираме културни настани во текот на летото, изјави директорот на установата, Сашо Тодоровски.
Младите кои нудат креативни идеи, изложби, промоции на книги, поезија, театарски претстави, сè од уметноста што може да се презентира на отворено ќе добијат поддршка од НУЦК „Трајко Прокопиев“ во презентација и организација на активностите со што ќе се збогати понудата од културни настани во Куманово.
На овој начин, сметаат одговорните од Центарот за култура, и младите ќе добијат можност да се презентираат пред јавноста, а кумановци ќе имаат можност на отворено да проследат културни настани за време на летниот период.