Со изведбата на италијанската акробатска трупа „II POSTO“ на фасадата од зградата на Веро центарот во Скопје синоќа почна 8. Меѓународен уличен фестивал „БАСКЕРФЕСТ“.
Официјално фестивалот на градскиот плоштад „Македонија“ го отвори градоначалникот на Град Скопје, Коце Трајановски.
– Развојот на современиот туризам не може да се замисли без присуството на поливалентните вредности на културата, бидејќи туризмот е синтеза на културата манифестирана прекусите свои облици и културни вредности. Град Скопје стремејќи се визуелно да ја дефинира културната мисија за оплеменување на срцето на Скопје, веќе неколку години организира настани и манифестации преобразувајќи ги соновите во јаве.
– Манифестацијата Баскерфест 2013 којашто по осми пат традиционално се одржува под отворено небо со учество на над триесетина меѓународни артисти и уште толку домашни, кои со своите 500-тини возбудливи акробатски, пиротехнички, жонглерски, музички и театарски изведби, е настан со кој широко се отвораат портите на Скопје кон меѓународната публика, истакна градоначалникот Трајановски.
Граѓаните на Скопје во следните 10-тина дена ќе можат да уживаат во спектакуларните акробации на артистите од цел свет.
Музичката програма ќе биде зачинета со ноти на рап, реге, рок и етно музика, а во рамки на фестивалот ќе бидат одржани околу 30 концерти.
Годинава, Баскерфест ќе направи турнеја и низ цела Македонија. Првиот настап пред два дена се одржа во Гевгелија, а во Скопје, караванот на Баскерфест ќе остане до 23-ти, додека на 3 јули ќе се пресели во Дојран.
На 8. Баскерфест ќе настапат околу 100-тина артисти од дваесеттина земји. Еден од поспектакуларните настапи, ќе биде и настапот на рок групата „Star boy“ од Нов Зеланд составена од 9 членови која во своите настапи комбинира акробатска кореографија и употреба на пиротехнички елементи.
Деталната фестивалска програма можe да ја најдe на веб страницата www.buskerfestmakedonija.com.