Делегацијата на македонската влада, предводена од премиерот Никола Грувски утрово пристигна во Белград, на заеднички состанок со премиерот на Србија, Ивица Дачиќ и министрите.
По свечениот пречек пред палатата„ Србија“, започна состанокот на двајцата премиери.
Во исто време ќе се одржат и низа билатерални состаноци помеѓу министрите на двете влади.
Министрите за надворешна и внатрешна трговија и телекомуникации, енергетика, како и природни ресурси на Србија, Расим Љајиќ, Зоран Михајловиќ и Милан Бачевиќ ќе разговараат со заменикот на претседателот на владата на Македонија задолжен за економски прашања Владимир Пешевски, министерот за информации и администрација, Иво Ивановски и заменикот на министерот за животна средина Стево Темелковски.
Министерот за труд и социјална политика, Диме Спасов ќе се сретне со потпретседателот на српската владата и министер за труд, Јован Кркобатиќ, а Зоран Ставрески, со својот колега Млаѓан Динкиќ.
Министерот за здравство, Никола Тодоров ќе се сретне со министерката за здравство на Србија, Славица-Џукиќ Дејановиќ, а средба ќе имаат и министрите за земјоделство Горан Кнежевиќ и Љупчо Димовски.
Дејановиќ и Тодоров се очекува да потпишат меморандум за соработка во областа на здравството и медицинската наука.
Предвидено е средба и помеѓу министерката за внатрешни работи на Македонија, Гордана Јанкуловска со Ивица Дачиќ.
Двајцата министри за внатрешни работи треба да потпишат протокл помеѓу МВР на Србија и МВР на Македонија, за соработка во текот на туристичката сезона 2013 година.
Се очекува македонскиот премиер да го прими и претседателот на Србија, Томислав Николиќ.
Елена Георгиевска