Сметката на Македонската опера и балет ќе биде итно деблокирана со уплата од речиси 15.000 евра за да може институцијата да продолжи со работа. Директорот Васе Ристов веднаш побарал помош од Министерството за култура и совет од Владата како да се реши проблемот. Со оваа уплата сметката ќе биде ослободена, но за тоа како и зошто институцијата била втурната во долг од 800.000 евра, ќе се прави дополнителна ревизија. Увидот, односно ревизијата, ќе ја прават тројца нововработени, од кои еден раководител и двајца соработници бидејќи, според Ристов, секое друго решение, како да се чека на државна ревизија или да се ангажира приватна ревизија, е скапо и неефикасно.
„Во овој момент не можам да посочам директна одговорност за оваа состојба и за тоа ќе се погрижат ревизорите, кои ќе почнат со работа по претседателските избори. Овие долгови се калемеле повеќе години и обврските ги преземал секој нов раководител, а тие се зголемувале. Првото извршно решение ни стигна за долг од 2015 година за неисплатени обврски за печатени материјали. Важно е дека сега успеавме да се деблокираме и институцијата ќе продолжи непречено да работи. Не можам во овој момент да констатирам дали се правени злоупотреби на средства или не, но, секако, кога ќе заврши ревизијата и се утврдат неправилности, работата ќе ја преземат надлежните институции до конечно повикување на одговорност“, изјави Ристов за „А1он“.
Освен неисплатени обврски за печатење, како што дознава „А1он“, МОБ должи и за неисплатени хонорари, пробивани се буџети за оперски и балетски претстави, а не се штедело и за јадење и пиење.
Неисплатените обврски се прелевале од година на година и секој нов раководител ги наследувал, но не ги намирувал долговите на претходниот.
Ана Василевска