Портпаролката на руското Министерство за надворешни работи, Марија Захарова, коментирајќи ја изјавата на американскиот претседател Доналд Трамп дека САД дале најголем придонес за победата во Втората светска војна, денеска изјави дека поранешниот американски претседател Френклин Рузвелт го препознал одлучувачкиот придонес на Црвената армија во победата над нацистичка Германија.
На нејзиниот канал Телеграм, таа цитираше серија изјави на Рузвелт, во кои тој високо го пофали херојството на советската армија, пренесува ТАСС.
Американскиот политичар особено истакна дека „руските трупи уништија повеќе луѓе, авиони, тенкови и топови на заедничкиот непријател отколку сите други обединети нации заедно“.
Дополнително, во писмото до Јосиф Сталин на 4 февруари 1943 година, Рузвелт му честитал на советскиот лидер за неговата победа во битката кај Сталинград, истакнувајќи дека советската армија и народ се обединиле за „со својот пример да ги инспирираат сите обединети нации со нова решеност да ја вложат целата своја енергија за постигнување конечен пораз и безусловно предавање на заедничкиот непријател“.
Во фрагмент од писмото на Рузвелт до Сталин од 22 февруари 1943 година, кое го цитира и Захарова, поранешниот американски лидер го истакнал вештото раководство на Црвената армија, како и нејзината силна организација и решителност да го порази непријателот, без оглед на сопствените жртви.
„Црвената армија и рускиот народ секако ги доведоа вооружените сили на Хитлер до последниот пораз и го заслужуваат трајното восхитување на народот на Соединетите Американски Држави“, напиша Рузвелт.
Трамп претходно ги прогласи 11 ноември и 8 мај за Денови на победата во Првата и Втората светска војна.