Jужноафриканската полициска служба (SAPS) соопшти дека во саботата вечерта во напад врз угостителски објект западно од Јоханесбург загинале 17 лица – 13 мажи и четири жени.
Престрелката се случила околу 21:30 часот. Според полицијата, гостите се наоѓале во и пред локалот кога осомничените пристигнале и отвориле оган кон лицата кои биле надвор. Потоа влегле во објектот и продолжиле да пукаат кон гостите.
Според досегашните информации, напаѓачите биле вооружени со пушки „АК-47“ и пиштоли.
Полицијата соопшти дека напаѓачите претресувале дел од гостите и им ги одземале мобилните телефони, по што побегнале со две возила чија идентификација засега не е позната. Во инцидентот биле запалени и две возила.
Полицијата спроведува истрага, а на терен се испратени детективи и специјални единици во обид да ги пронајдат осомничените. Засега нема уапсени лица.
Во одделен инцидент, во неделата рано наутро, 10 лица загинале, а 11 биле повредени во престрелка во местото Лвандл, во близина на Кејптаун.
Според полицијата, вооружени напаѓачи околу 1:46 часот влегле во угостителски објект познат како „шисанјама“ и отвориле оган кон гостите.
Пет лица загинале на местото на нападот, додека уште пет им подлегнале на повредите по транспортот во болница. На медицинска помош се наоѓаат уште 11 повредени лица.
Полицијата отворила истрага за убиство и обид за убиство. Имињата на жртвите ќе бидат објавени откако ќе бидат известени нивните семејства.