Шефот на украинската воена разузнавачка служба Кирило Буданов верува дека Украина и Русија оваа година ќе постигнат примирје, пишува Киев Индипендент.
Тој го изрази овој оптимистички став во интервју со азербејџанскиот новинар Ејнулу Фатулаев.
– Звучи парадоксално бидејќи ние и Русите имаме различни барања, но верувам дека примирјето ќе стапи на сила оваа година. Колку долго ќе трае, колку ќе биде ефективно, е друго прашање. Но, мислам дека тоа ќе се случи. Повеќето компоненти потребни за примирје ги има – рече Буданов.
Иако преговорите со денови ги окупираат светските медиуми и иако Трамп му се јави на Путин, а американската и руската делегација се сретнаа во Ријад, се уште никој јасно не кажа како би функционирало примирјето.
Она што е познато е дека Украинците не сакаат замрзнување на конфликтот што ќе им даде време на Русите да се опорават и шанса за нова инвазија во иднина.
Украина бара безбедносни гаранции како што се членство во НАТО или нуклеарно оружје откако ќе се постигне долгоочекуваниот мир.
Зеленски рече дека европските партнери ќе мора да испратат од 100.000 до 150.000 војници во Украина за ефикасно да ја одвратат Русија.
Обединетото Кралство и Франција размислуваат за распоредување на многу помали мировни сили предводени од Европа до 30.000 војници.