Американскиот претседател Доналд Трамп денеска и честиташе на германската конзервативна Христијанско-демократска унија (ЦДУ/ЦСУ) за победата на изборите.
– Граѓаните на Германија, како и граѓаните на САД, се уморни од агендата без здрав разум што владееше долги години, особено на полето на енергетиката и имиграцијата – порача Трамп во објавата на неговата социјална мрежа.
Тој им честиташе на сите, посакувајќи им многу победи.
– Ова е голем ден за Германија, но и за САД, кои ги предводи господин Доналд Џеј Трамп – рече американскиот претседател.
Според првите излезни анкети објавени од германските медиуми, Христијанско-демократската унија (ЦДУ/ЦСУ) предводена од Фридрих Мерц е во водство со 29 отсто од освоените гласови на вонредните парламентарни избори во Германија, додека на второ место, според прогнозите, е десничарската Алтернатива за Германија со 19,5 отсто.
Социјалдемократската партија на поранешниот канцелар Олаф Шолц освои, според анкетите, 16 отсто од гласовите, што е нивен најлош резултат, пренесуваат германските медиуми.
Зелените освоија 13,5 отсто од гласовите, додека партијата Левица се најде на петтото место со 8,5 отсто.
Лидерот на ЦДУ/ЦСУ Фридрих Мерц прогласи победа на изборите, додека канцеларот во заминување Олаф Шолц рече дека не смее да се дозволи соработка со екстремната десница.