Американскиот претседател Доналд Трамп денеска изјави дека Иран побарал продолжување на преговорите со Соединетите Американски Држави.
Трамп додаде дека Вашингтон му соопштил на Техеран оти смета дека примирјето е завршено.
– Исламската Република Иран побара од нас да ги продолжиме разговорите. Ние се согласивме на тоа, но Соединетите Американски Држави јасно ставија до знаење дека примирјето е завршено – напиша Трамп на социјалната мрежа „Truth Social“.
Истовремено, турскиот министер за надворешни работи Хакан Фидан оцени дека примирјето меѓу Иран и САД сè уште може да опстане, и покрај тврдењето на Трамп дека тоа е завршено.
По самитот на НАТО во Анкара, Фидан изјави дека најновите активности на Иран претставувале „одмазда“ и истакна дека недоразбирањата и лошата комуникација меѓу двете страни придонеле за новата криза, пренесе порталот „The National News“.
Според него, евентуалниот мировен договор меѓу Вашингтон и Техеран би можел да биде основа за пошироки разговори за стабилноста во регионот.