Американските и нигериските сили вчера убија висок командант на исламистичката терористичка група Исламска држава (ИСИС), објави американскиот претседател Доналд Трамп. Тој ја потврди веста во објава на социјалната мрежа Truth Social, пишува CNN.
„Вечерва, по моја команда, храбрите американски сили и вооружените сили на Нигерија беспрекорно извршија внимателно испланирана и многу сложена мисија за отстранување од бојното поле најактивниот терорист во светот“, напиша Трамп.
Претседателот изјави дека Абу-Билал ал-Минуки, „вториот човек во командниот ланец на ИСИС на глобално ниво“, е убиен.
Тој додаде: „Тој повеќе нема да ги тероризира луѓето од Африка ниту да помага во планирањето операции против Американците“.
Ова не е првиот смртоносен напад што Трамп го наредил против наводните милитанти на Исламска држава во Нигерија. Трамп претходно ги обвини за прогон на христијаните во таа западноафриканска земја.
Во декември, Трамп објави дека наредил „силен и смртоносен удар против ИСИС“ во северозападна Нигерија, наведувајќи го убиството на невини христијани.