Специјалниот обвинител на Јужна Кореја побара смртна казна за поранешниот претседател Јун Сук-јеол по обвинение за организирање антидржавен бунт поради кратката воена состојба што ја воведе во декември 2024 година, објавија западните агенции.
Тимот на специјалниот обвинител Чо Еун-сук ја побара казната за време на последното рочиште за случајот на Јун во Централниот окружен суд во Сеул.
Јун, формално отстранет од функцијата во април минатата година, е на судење за воена состојба и низа скандали поврзани со неговото владеење.
Обвинението за водење бунт е најсериозно од сите што се покренати против него.
Се очекува пресудата да биде прочитана во февруари.
Јун вели дека неговиот декрет бил очаен, но мирен обид да ја покрене јавната свест за заканата што ја гледа од либералната опозициска Демократска партија, за која вели дека го искористила своето законодавно мнозинство за да ја попречи неговата агенда и да ја дестабилизира земјата.
Јун го нарече парламентот контролиран од опозицијата „дувло на бандити и антидржавни сили“. Но, по драматичните сцени во ноќта на воената состојба, доволен број пратеници од опозицијата, плус пратениците од партијата на претседателот кои се бореа да влезат во салата, влегоа во салата и заедно гласаа за поништување на декретот на Јун.