Унгарија нема да гласа за продолжување на сегашните санкции против руски и белоруски поединци на претстојниот состанок на Советот за надворешни работи на Европската унија, изјави денеска унгарскиот министер за надворешни работи Петер Сијарто.
– Треба да се остави време за американско-руски разговори, рече Сијарто во Вашингтон, пренесе МТИ.
Пред средбата со американскиот советник за национална безбедност, Сијарто рече дека „европските либерални политичари јасно сакаат Украина да ја продолжи војната и вршат притисок врз украинскиот претседател во таа насока“.
– Унгарската влада веќе е под огромен притисок во врска со продолжувањето на санкциите против руските и белоруските граѓани, рече Сијарто, додавајќи дека сегашните санкции истекуваат на 15 март, додека соодветната одлука мора да биде донесена до 10 март.
Сијарто претходно имаше и телефонски разговор со генералниот директор на Меѓународната агенција за атомска енергија (МААЕ) Рафаел Гроси по што изјави дека нападите врз нуклеарните централи во Украина се „неприфатливи“, а мирот е најдобра гаранција за нивно избегнување.
Како што наведе, Гроси оценил дека иако нападот на централата во Чернобил со право предизвика загриженост во Унгарија, објектот може да издржи многу поголем удар.
– Затоа, ниту по инцидентот, ниту оттогаш нема закана од нуклеарна катастрофа, сите мерења потврдија дека радијацијата воопшто не е зголемена. Сепак, се согласивме дека нападите врз нуклеарните централи се неприфатливи и дека нуклеарната безбедност мора да биде загарантирана, напиша Сијарто на Фејсбук.