Досега Катар играше клучна улога во обезбедувањето на ослободувањето на заложниците киднапирани од Хамас од Израел, изјави денеска унгарскиот министер за надворешни работи Петер Сијарто, нагласувајќи дека ослободувањето на тројца унгарски државјани не би било можно без помошта на оваа земја од Персискиот залив.
„Сега го замолив мојот пријател Солтан бин Саад Ал-Мураики, министер за надворешни работи, Катар да помогне во ослободувањето на последниот унгарски државјанин кој е заложник“, напиша Сијарто на Фејсбук, пренесе МТИ.
Тој изјави дека министерот Солтан го уверил дека Катар ќе продолжи да прави напори во интерес на прекин на огнот и обезбедување на ослободување на заложниците.
„Ние многу ги цениме напорите на Катар, бидејќи е јасно дека конфликтот во Газа предизвикува се повеќе конфликти и кризи во регионот, кои мора да се избегнат“, посочи Сијарто.
Тој рече дека мора да се посвети посебно внимание за да се спречи нов фронт меѓу Хезболах и Израел и да се направи Црвеното Море повторно безбедно за бродови. Конфликтот на Блискиот Исток е предмет на голема глобална загриженост повеќе од три и пол месеци, изјави унгарскиот министер за надворешни работи, додавајќи дека колку подолго трае, толку е поголема опасноста од ескалација.