Генералниот секретар на НАТО, Марк Руте, изјави дека нема јавно да коментира за тензиите меѓу САД и нивните европски сојузници околу барањето на американскиот претседател Доналд Трамп САД да го преземат Гренланд, автономна данска територија.
– Можете да бидете сигурни дека работам на ова прашање зад сцената, но не можам да го направам тоа јавно, рече Руте, објави Ројтерс.
Тој рече дека Трамп бил во право кога рекол дека Арктикот мора да биде заштитен од руско и кинеско влијание.
– Претседателот Трамп и другите лидери се во право. Треба да направиме повеќе таму. Треба да го заштитиме Арктикот од руско и кинеско влијание. Работиме на тоа колективно да го браниме арктичкиот регион, рече Руте.
Тој додаде дека сојузниците на НАТО не треба да дозволат тензиите околу Гренланд да ги одвлечат од потребата да ја бранат Украина.
„Фокусирањето на Украина треба да биде приоритет број еден, тоа е клучно за европската и американската безбедност“, рече Руте на панел-дискусија на Светскиот економски форум во швајцарскиот град Давос, објави Ројтерс.
Тој посочи дека не треба да ја губиме од вид ситуацијата кога станува збор за конфликтот во Украина.
„Навистина сум загрижен што ги губиме од вид и дека, во меѓувреме, Украинците нема да имаат доволно пресретнувачи за да се одбранат“, нагласи Руте.