Американскиот државен секретар Марко Рубио денеска изјави дека Русија се согласува на прекин на огнот, но под услови кои бараат анализа.
– Тие се среќаваат со нас. Тие зборуваат со нас. Тие даваат предлози. Тие се согласуваат на прекин на огнот, но со услови кои треба да ги анализираме… И никогаш не реков дека ќе биде лесно – рече тој на брифингот, коментирајќи го процесот на постигнување договор, соопшти Стејт департментот.
Рубио рече дека не верува оти Русите ги одложуваат мировните преговори и оти Вашингтон треба „многу да работи на двете страни“, особено со Русите, со кои САД „не комуницираат со години“.
Тој додаде дека војната меѓу Русија и Украина е сложена и трае повеќе од три години и подвлече дека никогаш не рекол дека би било „лесно“ да се заврши војната и да се постигне мировен договор.
Рубио изјави дека не може точно да каже кога ќе биде постигнат мировен договор за ставање крај на војната меѓу Русија и Украина и дека „тоа не зависи од САД“.
– Се обидуваме да постигнеме мир. Ние сме посветени на обидот да постигнеме мир онолку долго колку што е потребно. Тоа не значи дека можам да ви гарантирам договор за една недела или еден месец. Едноставно не можам да ставам временска рамка бидејќи не зависи од нас. Тоа е до Русите и Украинците. Тоа зависи и од нашите партнери во Европа кои имаат санкции кои, верувам, ќе треба да се земат предвид како дел од секој конечен договор – рече тој.
Рубио рече дека напредок е кога ќе се договорат барем деталите, бидејќи, како што наведе, треба да се утврди преговарачката позиција и кои се пречките за мир.
– Што се однесува до подготвеноста, ќе се тестира кога ќе дојде време за потпишување или ако се соочиме со пречки и се уште има отпор од едната или од другата страна, тогаш ќе знаеме. Но, се уште не сме во таа фаза – изјави американскиот државен секретар.