Норвешката полиција денес го претресе домот на поранешниот премиер на оваа земја, Торбјерн Јагланд, објавија неговиот адвокат и полицијата, како дел од тековната истрага за врските меѓу познати Норвежани и починатиот осуден сексуален престапник Џефри Епштајн.
Ројтерс, повикувајќи се на локалните медиуми, објави дека истражителите внеле картонски кутии во резиденцијата на Јагланд во Осло.
Рацијата на единицата за финансиски криминал „Оекокрим“ се случи еден ден откако Советот на Европа, кој Јагланд го водеше од 2009 до 2019 година, му го одзеде дипломатскиот имунитет.
„Оекокрим моментално врши претрес на живеалиштето и рекреативните објекти на Јагланд. Ова беше очекувано и стандарден дел од истрага од ваков вид“, изјави адвокатот на Јагланд, Андерс Бросвет.
Јагланд е обвинет за сериозна корупција, додаде неговиот адвокат. Тој моментално е под истрага, пред да биде официјално обвинет.
Во оваа фаза, осомничениот има право да ангажира адвокат, а полицијата има можност да го уапси во секое време, доколку е потребно за понатамошниот тек на истрагата.
Во Норвешка, формалните обвиненија се поднесуваат многу подоцна во судскиот процес, понекогаш само неколку недели пред почетокот на судењето.
„Многу сум среќен што овој случај се разјаснува“, рече Јагланд, објави денес „Афтенпостен“.