Американскиот претседател Барак Обама го отвори дводневниот самит на лидерите на земјите од Југоисточна Азија со повик за уредување на споровите на мирен начин и со законски средства.
Во резиденцијата Снилендс во летувалиштето Ранчо Мираж, во Калифорнија, Обама и лидерите на десетте држави од Асоцијацијата на земјите од Југоисточна Азија (АСЕАН) ќе разговараат за прашања, поврзани со економијата и безбедноста во регионот.
Во кусото поздравно обраќање Обама ја нарече оваа прва средба на АСЕАН на американска територија плод на неговиот личен ангажман за трајно партнерство со разнолика група држави.
Тој изјави дека АСЕАН игра централна улога во мирот и просперитетот на регионот.
Обама ја потенцира неопходноста од заштита на меѓународното право и решавање на споровите на мирен начин и со законски средства, алудирајќи на територијални спорови меѓу повеќето земји од АСЕАН и Кина во Јужнокинеското Море.
Во АСЕАН членуваат Тајланд, Малезија, Сингапур, Индонезија, Филипини, Брунеи, Виетнам, Лаос, Мјанмар и Камбоџа и тие заедно претставуваат седмата по големина економија во светот.