Француската лидерка на крајната десница, Марин Ле Пен, изјави дека е решена да биде кандидатка на Националното собирање (RN) на претседателските избори во 2027 година.
– Не, не, апсолутно не се откажувам, јас сум многу борбена, изјави Ле Пен во интервју за Ouest-France, објави телевизијата BFM.
Ле Пен објасни дека рекла дека ако францускиот Врховен суд донесе одлука за нејзината жалба премногу блиску до датумот на изборите, кампањата на Националното собирање нема да може да се одвива во соодветни услови.
Во такви околности, лидерката на RN вели дека ќе биде принудена да му го предаде лидерството на претседателот на партијата, Џордан Бардела.
Во првостепена пресуда во случајот со асистентите на европскиот парламент, Марин Ле Пен беше осудена на петгодишна забрана за кандидирање за јавни функции, а пресудата е привремено извршлива.
Жалбеното рочиште ќе се одржи од 13 јануари до 12 февруари 2026 година.
Одлуката на Апелациониот суд се очекува во текот на летото, но Марин Ле Пен предвиде во интервју за Ouest-France дека таа би можела да биде донесена во септември.
„Веќе реков дека нема да ги загрозам шансите на мојот политички табор на претседателските избори, што беше протолкувано како откажување“, нагласи таа.
На почетокот на ноември, лидерката на пратениците на RN во францускиот парламент изјави дека секако нема да се кандидира во 2027 година ако нејзината казна биде потврдена во жалбата и дека веднаш ќе ја објави својата одлука, без да чека евентуална пресуда од Врховниот суд.
Марин Ле Пен и Џордан Бардела значително доминираат во анкетите за претседателските избори, според BFM.
Претседателот на партијата моментално патува низ Франција промовирајќи ја својата книга „Што сакаат Французите“, а промоциите привлекуваат голем број читатели.