Германската полиција уапси 16-годишен државјанин на Украина под сомнение за убиство на 32-годишна жена и нејзината 19-месечна ќерка.
Тинејџерот самиот дошол на местото на злосторството и ја признал својата поврзаност со случајот, објавија германските медиуми.
Злосторството се случило рано наутро во недела на гробиштата Валдфридхоф во градот Дорстен, во сојузната покраина Северна Рајна-Вестфалија.
Телото на жената го пронашол минувач кој веднаш ја известил полицијата. По пристигнувањето на местото на настанот, полицајците потврдиле дека жената е мртва и дека најверојатно била претепана до смрт.
Не долго по првото шокантно откритие, полицајците го пронашле и телото на 19-месечно девојче во грмушките во близина. Веднаш била започната истрага, а телата биле пренесени на обдукција за да се утврдат точните околности на смртта.
Иако еден осомничен веќе е уапсен, полицијата сè уште интензивно ги истражува сите околности на злосторството.
Мотивот и точната позадина на бруталното двојно убиство сè уште не се познати.