Лидерката на Францускиот Национален собир (Rassemblement National), Марин Ле Пен, доби забрана да се кандидира за јавна функција во рок од пет години – и осудена на четири години затвор. Ле Пен, која ја напушти судницата пред да биде прочитана пресудата, беше прогласена за виновна во случајот за проневера.
Две од четирите години затворска казна се условни – не е јасно дали воопшто ќе одлежи затвор. Забраната ги урива нејзините надежи да се кандидира на претседателските избори во 2027 година.
Десничарската лидерка и 24 други функционери од нејзината партија Национален собир се обвинети дека пренасочиле повеќе од три милиони евра од средствата на Европскиот парламент за плаќање на персоналот со седиште во Франција помеѓу 2004 и 2016 година. Седејќи во првиот ред од судницата во Париз, Ле Пен не покажа никаква реакција додека судијата ја читаше пресудата.
Судијата Бенедикт де Пертуис рече: „Утврдено е дека сите овие лица всушност работеле за партијата, без да им бидат доделени никакви задачи од европратеникот. Истрагата, исто така, утврди дека ова не е административна грешка, туку повеќе е проневера како дел од системот дизајниран да ги намали трошоците на партијата“.
Ле Пен ги отфрли обвинувањата дека била на чело на „системот“ чија цел е да ги исфрли средствата од ЕУ во корист на нејзината партија. Обвинетите негираа дека сториле нешто лошо и тврдеа дека средствата биле користени легитимно.
Судењето траеше девет недели на крајот на минатата година. Ле Пен (56) трипати се кандидираше за претседател, а претходно изјави дека изборите во 2027 година ќе бидат нејзиниот последен обид да ја освои највисоката функција.