Американскиот Сенат, со 52 гласа „за“ и 47 гласа „против“, усвои мерка со која се спречува претседателот на САД, Доналд Трамп, сам да ги продолжи воените дејствија во Венецуела.
Ова се случи откако САД го уапси венецуелскиот претседател Николас Мадуро во Каракас на 3 јануари, обвинувајќи го за наркотероризам.
Поточно, Сенатот усвои мерка позната како Резолуција за воени овластувања, а за нејзино усвојување во Сенатот беше потребно просто мнозинство.
Треба да се напомене дека републиканците на Трамп имаат мнозинство во Сенатот.
Станува збор за мерка што подразбира дека претседателот мора да побара одобрение од Конгресот на САД ако сака повторно да дејствува воено во Венецуела. Таа беше донесена по предлог на демократскиот сенатор Тим Акин и републиканскиот сенатор Ранд Пол.
Споменатата мерка оди во Претставничкиот дом на разгледување, каде што Републиканската партија има мало мнозинство.
„Немојте да се залажувате, бомбардирањето на главниот град на друга земја и соборувањето на нејзиниот лидер е едноставно чин на војна. Ниту една уставна одредба не му дава толку многу овластувања на претседателот“, рече Пол.
Уставот на САД предвидува дека Конгресот има овластување да објави војна.
Трамп и неговите сојузници во Конгресот уверуваат дека тој не морал да се консултира со Конгресот за рацијата во која беше уапсен Мадуро. Тие веруваат дека дејствувале органите за спроведување на законот.