Во трагедијата во пожарот кој го зафати ноќниот клуб во Кочани животот го загуби и Андреј Лазаров (25), фудбалерот на Шкупи од Чаир.
Информациите се дека тој им подлегна на повредите додека беше хоспитализиран во болницата во Штип.
Како што информираат од фудбалскиот клуб Шкупи, Лазаров во дискотеката помагал на останатите присутни да се извлечат, на крајот се задушил во чадот.
„Лазаров го загуби животот обидувајќи се да им помогне на другите да се спасат од просторот зафатен од пожар. Тој се задуши од чадот за време на неговите обиди да спаси животи, покажувајќи храброст и хуманост до последниот момент. Неговиот херојски чин засекогаш ќе остане во нашето сеќавање, како сведоштво за неговиот благороден карактер и неговото големо срце“, објавија од Шкупи.
Фудбалерот од Кочани во кариерата настапуваше за хрватските клубови Горица и Рудеж, како и македонските тимови Тиквеш, Работнички и Металург.