Пензионираниот дефанзивец на Барселона, Жерар Пике (38) беше гостин кај поранешниот соиграч од репрезентацијата, Икер Касиљас (43) во поткаст, каде разговараа на повеќе теми.
Дефанзивецот и голманот со години беа столбот на „Фуријата“, а Пике претстави револуционерна идеја која може да стави крај на „досадните“ игри. Имено, тој смета дека екипите треба да останат без бодови доколку натпреварот заврши 0-0.
– Нешто мора да се промени. Не може да се случи да одите на фудбалски стадион, да потрошите 100, 200 или 300 евра, а натпреварот да заврши 0-0. Предлог за разгледување би бил доколку натпреварот заврши без голови, екипите да не добијат бод – изјави Пике како гостин во поткастот.
Тоа би било вистинска револуција во фудбалот, а слични идеи имаше и порано.
Арсен Венгер (75), на пример, предложи по изедначените натпревари да се шутираат пенали, при што победничкиот тим ќе освои два бода, а поразениот еден бод.
Поранешните ривали од Барселона и Реал се осврнаа и на неизбежната тема: Кој клуб е поголем.
– Реал Мадрид е поголем клуб од Барселона затоа што има повеќе титули – тврдеше Касиљас, а Пике му возврати.
– Да, но Барса имаше неколку генерации во кои играле најдобрите играчи некогаш. Имаше сезони кога Реал не освојуваше титули и никој не се сеќава на тоа, но кога тоа ќе и се случи на Барса, сите зборуваат за тоа. Затоа е поголем клуб – изјави Пике.