Наградниот фонд на Вимблдон се зголеми на рекордни 53,5 милиони фунти (околу 73 милиони долари), а шампионите во женска и машка конкуренција во сингл ќе добијат по три милиони фунти, односно четири милиони долари, објавија денес организаторите на тенискиот Гренд слем турнир.
Наградниот фонд се зголеми за 3,5 милиони фунти во споредба со минатата година, или седум проценти, што е двојно повеќе од она што им беше доделено на натпреварувачите на тој турнир пред 10 години.
„Исклучително сме горди на фактот дека ако се осврнете 10 години назад, можете да видите зголемување, оваа година за седум проценти. И ги слушавме играчите, работевме со играчите“, изјави претседателката на клубот „Ол Ингланд“ – Дебора Џеванс.
Победниците во поединечна конкуренција на Вимблдон ќе добијат 11,1 проценти повеќе пари од минатата година, што е резултат на растечките барања од играчите за поголем дел од профитот на Гренд слем турнирот.
Играчите кои ќе изгубат во првото коло во поединечна конкуренција ќе добијат 66.000 фунти, што е зголемување од 10 проценти во однос на минатата година.
Вимблдон ќе започне на 30 јуни и ќе трае до 13 јули.
За првпат во историјата на најстариот Гренд слем турнир, линиските судии ќе бидат заменети со електронски систем.