На Олимпискиот стадион во Барселона утре ќе се игра натпревар за солидарност помеѓу репрезентациите на Каталонија и Палестина. Досега се продадени околу 25.000 билети, а организаторите очекуваат дека бројот на гледачи ќе продолжи да се зголемува како што се приближува натпреварот.
Станува збор за хуманитарен настан кој ги собира навивачите, но и јавни личности од политиката и спортот, со силна поддршка од платформата ACT X PALESTINE која стои зад иницијативата.
Еден од најпрепознатливите гласови кои ги повикаа навивачите да ги наполнат трибините е сегашниот тренер на Манчестер Сити и поранешен тренер на Барселона – Пеп Гвардиола, кој е познат по своето јавно застапување на оваа тема со години.
„Ова е повеќе од симболичен натпревар. Денес сите знаеме што се случува и Палестинците ќе видат дека постои дел од светот кој мисли на нив“, рече Пеп.
„Светот ја остави Палестина сама. Ние ништо не направивме. Не е нивна вина што се родени таму. Сите ние му дозволивме на Израел да уништи цел народ. Штетата е направена и е непоправлива“ – порача Гвардиола.
Во истото обраќање, Гвардиола, исто така, остро ги критикуваше светските политички лидери за нивниот став кон војната во Газа.
„Не можам да замислам некој да ги брани масакрите во Газа. Нашите деца би можеле да бидат таму и да бидат убиени само затоа што се родени таму. Имам многу малку доверба во лидерите. Тие прават сè што е потребно за да останат на власт“, рече Пеп.
Тој го гледа натпреварот меѓу Каталонија и Палестина како начин барем делумно да се привлече вниманието кон страдањето на населението во Газа и пошироката област.
„Симболизмот помага да се подигне свеста, но зад него мора да стои нешто што се движи. Секогаш постои причина за демонстрации, а во овој случај тоа е фудбалски натпревар. Тоа е симболично, но е подобро од ништо – барем Палестинците можат да мислат дека ние сме тука и дека стадионот носи радост“ – порача легендарниот фудбалски стратег.