По пласманот на Македонија на Европското кошаркарско првенство во 2015 година, на средбата со новинарите селекторот Александар Џикиќ беше придружуван од целиот тим кој го оствари овој успех. На прес-конференцијата по дуелот со Белорусија се појавија сите играчи, стручниот штаб (со исклучок на тренерот Емил Рајковиќ) и комплетниот лекарски тим.
– Ја остваривме целта. Среќни сме и задоволни од постигнатото, но јас не сум задоволен од прикажаното, затоа што знам дека овие момчиња можат и многу подобро. Сепак, овие момчиња заслужија да играат на Европското првенство, изјави селекторот Џикиќ, дополнувајќи дека најважно од се е што Македонија во континуитетот ќе игра со најдобрите европски кошаркарски репрезентации.
Иако, пред почетокот на квалификациите остана без комплетната петорка која во минатото го носеше товарот во квалификациите, но и на Европските шампионати, предводникот на црвено-жолтите Џикиќ запрашан, дали постои можност за евентуални промени односно „џокер’’ за ЕП догодина, одговори:
„Не гледам причини за некои други кои сега не се тука. Овие играчи заедно со мене и стручниот штаб минаа низ стресни моменти и јас знам како тие реагираат на стрес. За некои други играчи не можам да коментирам, сега е рано да се зборува за Европско првенство. Но можам да кажам дека овие момци функционираа како тим. А, за тоа дали некому треба да му поставиме слика и да ја бакнуваме, не вреди да се зборува’’.