Научно-фантастичната акција „Се во исто време“ е апсолутен победник на 95. Оскари со седум златни статуетки, меѓу кои и за најдобар филм. Воениот спектакл „Ништо ново на запад“ освои четири Оскари, а церемонијата ја одбележа и големото враќање на Брендан Фрејзер, кој беше прогласен за најдобар актер.
Филмот „Се во исто време“ триумфираше во три од четирите актерски категории. Мишел Јао е првата актерка од Азија што освоила Оскар за главна улога.
Ке Хју Кван го освои признанието за најдобра машка споредна улога, а легендарната Џејми Ли Кертис го освои првиот Оскар во кариерата .
Тандемот Даниел Кван-Даниел Шајнерт беше награден за режија и за оригинално сценарио.
Успехоѕ на Брендан Фрејзер во категоријата најдобра машка улога е приказната за уште еден неверојатен камбек. За ѕвездата на бројни комедии од 1990-ите, „Кит“ на Дарен Аронофски беше првата главна улога од 2013.
„Ова е благодарение на Дарен, кој ми фрли креативен спас“, изјави Фрејзер.
Германскиот „All Quiet on the Western Front“ освои четири оскари, меѓу кои и за најдобар странски филм. „Пинокио“ на Гилермо дел Торо е најдобар долгометражен анимиран филм, а „Навални“ најдобар документарец.