Пресли Гербер, манекен и син на Синди Крафорд и Ренди Гербер, почина во неделата на 27-годишна возраст. Во една од своите последни објави на социјалните мрежи тој отворено зборуваше за лекувањето во кое користеше психоделична супстанција.
Гербер, брат на манекенката Каја Гербер, почина на 20 септември во установа за рехабилитација, според евиденцијата на мртовечницата на округот Лос Анџелес, до која дојде списанието „Пипл“.
Претставник на неговото семејство ја потврди веста за „Пипл“ и порача: „Семејството моли за приватност во овие исклучително тешки и болни моменти“.
Лекување со ибогаин
Во една од последните објави пред смртта, Гербер во март сподели видео снимено непосредно пред да прими голема доза ибогаин. Според „Стенфорд Медисин“, ибогаинот е природна психоделична супстанција која се добива од кората на коренот на западноафриканската грмушка Tabernanthe iboga, а меѓу другото се истражува и неговата примена во лекувањето на зависности.
„Момент на тишина пред сè да се промени“, напиша Гербер покрај објавата. „Бев целосно преплашен и знаев дека повторно ќе бидам ако некогаш треба да се соочам со нешто слично“.
Тој ги сподели и мантрите со кои се водеше за време на третманот, кој е легален во некои земји, но не и во Соединетите Американски Држави.
Напиша дека не му било лесно да ја препушти контролата, но верувал дека го води нешто поголемо од него.
„Знаев зошто сум таму. Се соочив со она од кое бегав и некаде во сето тоа повторно почнав да се пронаоѓам. Ќе видиме“.
Тој напиша и дека „се моли тоа да биде последен пат кога мора да се враќа“.
„Следниот пат би сакал тоа да го направам по своја одлука“, продолжи тој, а потоа му се заблагодари на „неверојатниот, грижлив и проклето добар тим“ кој му помогна за време на третманот.
Пораки за поддршка од мајката и сестрата
Под објавата се огласија и членови на неговото семејство.
Неговата мајка, 60-годишната Синди Крафорд, напиша: „Ти си борец! Помина низ оган за да се пронајдеш себеси! Толку сум горда!“
Неговата сестра Каја Гербер, која има 25 години, додаде: „Тоа е мојот брат. Проклето сум горда“.
Претходно отворено зборуваше за менталното здравје
Гербер, роден во 1999 година на Беверли Хилс, и пред смртта отворено зборуваше за проблемите со менталното здравје и злоупотребата на супстанции.
„Се борев со менталното здравје, депресијата и некои други работи што доаѓаат со тоа. Мислам дека ми е доволно ако помогнам на една личност или на сто луѓе да излезат од состојбата во која јас се наоѓав во еден момент од животот“, рече тој во 2023 година во подкастот „Studio 22“.
„Менталното здравје е проблем. Тоа е толку голем дел од мојот живот. Тоа е работа која трае 24 часа дневно, седум дена во неделата, и со неа доаѓаат толку многу работи“, продолжи тој.
„Тоа е всушност она што сакам да го правам – да им помагам на луѓето, без разлика дали сте депресивни или се борите со нешто што негативно влијае врз вашето тело. Може да биде што било и нема осудување“.
Тој додаде: „Видов сè и научив многу работи. Се надевам дека јас направив некои грешки наместо други луѓе, за тие да не мора да ги направат истите грешки како мене“.
Каја за десетгодишната борба на братот со зависноста
Во септемвриското издание на списанието „Вог“ за 2026 година, Каја се осврна на она што списанието го опиша како десетгодишна борба на Пресли со зависноста од дрога.
„Кога нешто такво ќе се случи во семејството, тоа некако менува сè“, рече Каја.
„Мислам дека затоа почнав да се доживувам себеси како ’детето со кое нема проблеми‘ и никогаш не сакав да барам помош. Ми се чинеше дека би било премногу родителите да имаат две деца на кои им е потребна помош“.
Таа додаде дека ѝ било освежувачки да види колку нејзиниот брат беше отворен кога станува збор за неговиот живот.
„Нашите родители поголемиот дел од нашите животи беа многу, многу приватни и ништо не споделуваа, а сега го имаме мојот брат, кој на некој начин ни стана учител и кој вели: ’Ќе им ја покажам на сите мојата човечка страна‘“.
„Од светот можете да скриете само толку многу“, рече Каја. „А кога се обидувате нешто да скриете, личноста само почнува да се чувствува како да се срамите од неа“.