Британскиот пејач Бој Џорџ денеска изјави дека „животот му се променил до непрепознатливост“ откако ја објавил песната „We Will Dance Again“, со која ја поддржува израелската воена операција во Газа.
На социјалните мрежи, поранешната ѕвезда на британската поп-сцена од 1980-тите зборуваше за последиците од својот став и остро критикуваше дел од поддржувачите на палестинската страна, пренесува „Фигаро“.
„Речиси секаде каде што одам чувствувам анксиозност, но не жалам за својата одлука“, напиша Бој Џорџ.
Според неговите зборови, тие ја поддржуваат Палестина „затоа што стана модерно да се грижат за тоа“.
„Би отишол дури дотаму да кажам дека тие се најголемите и најодвратните измами што шетаат по оваа земја“, напиша Бој Џорџ, кој ја објави песната „We Will Dance Again“, создадена со помош на вештачка интелигенција, кон крајот на јули.
Песната предизвика бројни критики кон поранешниот пејач на групата „Culture Club“.
„Зошто од луѓето кои ги поддржуваат своите еврејски пријатели се бара да даваат објаснувања, додека измамници како Ед Ширан, Џејд и безброј други можат да тврдат дека се грижат за ситуација што не би ја разбрале дури ни ако се обидат?“, наведе Бој Џорџ.
„Во последните неколку месеци, мојот живот се промени до непрепознатливост“, напиша Бој Џорџ, наведувајќи дека некои негови „пријатели се свртеле против него“.
Тој наведе дека тоа боли, бидејќи знае дека тие не ги познаваат Евреите, туку и многу добиле благодарение на своите врски со нив.
По контроверзите предизвикани од песната „We Will Dance Again“, Бој Џорџ беше принуден да се повлече од лондонската рок-опера „Исус Христос Суперстар“.
„Вие велите геноцид, јас велам војна. Затоа постои војската, кога сме нападнати. Дали е насилно? Секако дека е, кога знаете дека сакаат да нè убијат сите до последен“, пее Бој Џорџ во песната „We Will Dance Again“.
Во интервју за британскиот весник „Телеграф“ во јуни, Бој Џорџ своето застанување на страната на Израел го оправда со врските со „бројни еврејски пријатели“.
„Британските Евреи отсекогаш го правеле Лондон подобар“, додаде пејачот во својата објава.