Коалицијата ВМРО за Македонија денеска беше во посета на Градскиот трговски центар, каде членовите на коалицијата имаа средба со граѓани и сопственици на дуќани. Од ВМРО за Македонија обвинија дека досегашната влада е виновна поради тоа што ГТЦ е претворен во руина.
– Она што можеме да го забележиме од нивните изјави е тоа дека некогаш ГТЦ беше место со кое Скопје можеше да се годрее, а сега буквално е претворено во руина поради лошото раководење на трговскиот центар од страна на менаџментот кој е поставен од Владата на РМ, а даден е на Амди Бајрам и неговата фамилија, истакна Марјан Огњановски од коалицијата.
Тие обвинија дека трговскиот центар е претворен во пералница на пари за партијата на Амди Бајрам. Според нив, трговскиот центар е изграден со вредонст од 90 милиони евра, а 82% е продаден на приватни фирми и сопственици, што значи дека државата инкасирала повеќе од 80 милиони евра.
Како што велат од ВМРО за Македонија, сегашната цена на ГТЦ е преполовена и парадоксално е тоа што државата раководи со трговскиот центар иако е спопственик на само 12% од целиот трговски центар.
– Во текот на прошетката низ ГТЦ забележавме дека хигиената е на максимално ниско ниво и покрај тоа што во изминатиот период има вработено повеќе од 100 вработени, од кои 40 се хигиеничари. Ескалаторите не работат, осветлувањето е на многу ниско ниво, нема тоалети, значи овој Градски трговски центар наликува на некој провинциски трговски центар, рече Огњановски.
Коалицијата ВМРО за Македонија вети ако дојдат на власт, ќе донесат современ менаџмент кој што ќе го врати сјајот на ГТЦ и исто така ветија дека ќе им дозволат на сопствениците на локалите да учествуваат во управувањето.
Виктор Јованов