На денешното рочиште за убиствата на Вања Ѓорчевска и Панче Жежовски, сведокот Гоце Трајковски, кој требаше да даде исказ во Судот за настани поврзани со случајот, не се појави во судницата.
Според зборовите на неговата мајка, Кираца Трајковска, Гоце утрово доживеал паничен напад, а имал и висок крвен притисок.
Гоце Трајковски, според информациите, беше еден од првите кои се вклучија во потрагата по Вања. Тој му помагал на нејзиниот татко Александар Ѓорчевски во обидите да ја пронајдат Вања.
Како сведоци во судот се појавија и Зоран Ѓорчевски, таткото на Александар Ѓорчевски, дедото на Вања и Иванка Ѓорчевска, бабата на убиеното девојче.
За грабнувањата и убиствата на Вања и Панче се обвинети четворица извршители – Љупчо Палевски Палчо како првообвинет, и Велибор Манев, Влатко Кешишов и Боре Видевски, а таткото на Вања, Александар Ѓорчевски е обвинет за помагање во грабнувањето на неговата ќерка.
Сите обвинети за овие злосторства се изјаснија дека се невини.
Судењето го води судијата Ивица Стефановски, а застапник на обвинението е обвинителката Жаклина Крстевска.