Пет лица повредени во сообраќајката што се случи попладнево на магистралниот пат Гостивар – Кичево, се пренесени на скопските клиники, а едно е задржано во Болницата во Гостивар.
Сите се надвор од животна опасност.
Сообраќајот кој беше во прекин заради увид, од 18:30 часот е нормализиран и се одвива во двата правци без застој, информираше портпаролот на СВР Тетово, Фатмир Реџепи.
Тој потврди дека во сè уште непознати околности, попладнево дошло до сообраќајна незгода во која учествувале четири мотоцикли и четири патнички возила.
-Повредените не се во животозагрозувачка состојба, но заради карактерот на повредите со амбулантни возила се испратени на лекување на скопските клиники, изјави Реџепи.
Од 16 часот сообраќајот на магистралниот пат Гостивар – Кичево заради сообраќајката беше во прекин, а возилата се пренасочуваа по споредните локални патишта.