Мотоциклист (30) заврши со тешки повреди, а неговата 22-годишна сопатничка се здоби со телесни повреди во сообраќајна несреќа што се случи синоќа во Свети Николе.
Според информациите од МВР, несреќата е пријавена во 22:31 часот во ОВР Свети Николе, а се случи на улицата „Филип Втори“.
Во несреќата учествуваа патничко возило „пежо“ со светиниколски регистарски ознаки, управувано од Љ.Д.(68) од Свети Николе, и мотоцикл „хонда“ управуван од С.П.(30) од селото Преод.
Мотоциклистот се здоби со тешки телесни повреди, додека неговата сопатничка В.С.(22) од Свети Николе се здоби со телесни повреди.
Повредите им се констатирани во болницата во Штип.
Увид изврши екипа на ОВР Свети Николе, при што е утврдено дека 68-годишниот возач на „пежото“ управуваше со возилото под дејство на алкохол. Кај него се измерени 1,19 промили алкохол во крвта.