За подобрување на правата на полициските работници за заштита во службата во случај на потреба од употреба на огнено оружје денеска во Скопје се разговараше меѓу независните полициски синдикати на Македонија и на Србија.
– Во изминатите неколку месеци ние во Република Македонија, а и вработените во српската полиција, особено членовите на независните синдикати имаме слични проблеми во текот на редовните работни активности и функционирањето на работните места. Пред 40-тина дена имавме сериозен проблем со известувањето од Струмица каде полициски службеник пред време од одредени институции беше осуден за употреба на оружје за време на полициска акција, без судски да се докаже неговата вина и практично го направија потенцијален убиец, изјави претседателот на македонскиот Независен полициски синдикат Гоце Делчев Тодев по средбата.
Нагласи дека сите законски регулативи во наредниот период мора да се прилагодат според вистинската потреба на терен и на полициските работници, во случај на потреба од употреба на огнено оружје, и да бидат според европските и светските стандарди. Посочи дека што поскоро треба да се укине Колективниот договор потпишан во 2015 година со Македонскиот полициски синдикат, бидејќи, како што рече, им нанесе огромни штети на вработените во полицијата.
Претседателот на Независниот синдикат на полицијата на Србија, Милош Јеленковиќ појасни дека двата синдиката се потписници на договор во кој се обврзале дека ќе се пружаат взаемна поддршка и дека ќе имаат заеднички активности.
– Она што е проблем во Србија, тоа е проблем и во Македонија, а тоа се платите и заштитата на полицијаците во текот на службата. Ние работиме со нашето Министерство да се зголеми казнената политика и заштитата на полицијата, бидејќи само добро заштитен полицаец може да пружи максимална заштита на граѓаните, рече Јеленковиќ и посочи дека во Србија наскоро ќе има измена на законските решенија во корист на полицајците со кои ќе добијат поголема заштита и нема да бидат осудувани за употреба на оружје пред за тоа да одлучи судот.
Прецизира дека во Србија се слуша гласот на сите синдикати без разлика дали се репрезентативни или не и додаде дека Законот јасно пропишува што прават репрезентативните, а што останатите синдикати.
– Разлика во третманот на синдикатите има само при склучувањето на колективните договори, а при предлозите, сугестиите и решавањето на проблемите застапени се сите синдикати, потенцира Јеленковиќ.