Со доделување на Осмооктомвриска награда и признанија, пуштање во употреба на повеќе локални патни правци и други свечености, денеска, во Крива Паланка, ќе биде одбележан Денот на ослободувањето „8-ми Октомври“.
По повод 70-годишниот јубилеј, во чест на извојуваната победа од страна на борците од НОБ, ќе се одржи свечена седница на која градоначалникот Арсенчо Алексовски ќе се осврне на историскиот развој на Крива Паланка и придобивките во изградбата и модернизацијата на општината во изминатиот период. На седницата ќе бидат доделени и највисокото општинско признание-Осмооктомвриската награда, како и повеќе осмооктомвриски признанија за особен придонес и постигнувања во повеќе области, кои се од големо значење за афирмацијата и развојот на Крива Паланка.
Пред споменикот на паднатите борци од НОБ, делегации на локалната самопуправа, државни и локални институции ќе положат цвеќе и ќе им оддадат почит на кривопаланечките жртви во борбата против фашистичките окупатори.
Свеченостите продолжуваат со пуштање во употреба на три локални патни правци: село Конопница-село Мождивњак, Крива Паланка-село Мартиница преку населбата Скрљава и локалниот пат во село Конопница кај местото викано Крст.
Во вечерните часови, пак, на новиот плоштад „Карпошово востание“ Гардиската единица на АРМ ќе изведе методско-показна вежба, а во НУ Центар за култура ќе се одржи концерт на Воениот оркестар при АРМ.