Советот на општина Крива Паланка на последната седница донесе одлука за основање културно-забавна манифестација музички фестивал „Џој фест“.
Со оваа одлука музичкиот фестивал „Џој фест“ кој првпат се одржа во август 2012 година се основа како културно-забавна манифестација со традиционален карактер.
Целта на оваа манифестација е развој и популаризација на алтернативната музичка култура, доближување на вистинските музички вредности до граѓаните на општината и афирмација и популаризација на општина Крива Паланка. Ќе се реализира од страна на уметнички директор во содејство со градоначалникот и стручните служби на општината.
Според Правилникот за реализирање на организацискиот и програмскиот дел ќе се оствари соработка со поединци и институци од областа на културата и уметноста од Република Македонија и странство, музички фестивали и манифестации од областа на алтернативната, рок и поп музика, здруженија и асоцијации од областа на музиката и творештвото, како и со државните органи и институции на Македонија. Право на учество ќе имаат поединци и бендови кои продуцираат и популаризираат алтернативна музика и култура од музичките правци поп, поп-рок, алтернатива сканк, панк, гранч, метал, хеви-метал, ска и други.
Финансиските средства за реализација на традиционалната културно-забавна манифестација „Џој фест“ во Крива Паланка ќе се обезбедуваат од буџетот на општината, Министерството за култура на Република Македонија, спонзорства и други извори. Фестивалот ќе се одржува секоја година во втората половина на август, а во зависност од финансиските средства ќе се одлучи дали истиот ќе трае еден, два или повеќе денови.