Претседателот на Владата на Република Македонија Никола Груевски, денеска во Талин, оствари средба со премиерот на Естонија, Андрус Ансип. Двајцата соговорници ги поздравија одличните односи кои постојат меѓу Македонија и Естонија и кои континуирано се развиваат во духот на пријателството, соработката и меѓусебното почитување.
Како што соопшти владината прес-служба, соговорниците изразија посветеност и заложба на личен ангажман за унапредување на економските односи, зголемување на трговската размена и соработка на полето на инвестициите.
Посебно се разговараше за можностите за воспоставување на конкретна соработка во областа на информатичко-комуникациската технологија, текстилната индустрија, земјоделството и туризмот.
Премиерот Груевски го информираше неговиот естонски колега Ансип за реформите кои се преземаат во насока на остварување на европската и евроатланската интеграција и се заблагодари на принципиелната поддршка која Естонија ја дава на нашите стратешки определби.
Естонскиот премиер Ансип истакна дека Естонија и понатаму ќе се залага за реализација на политиката на проширување на ЕУ и политиката на отворени врати на НАТО и дека естонската поддршка на македонските евроатлански интеграции ќе продолжи.
Двајцата премиери разговараа и за модалитетите на модернизација на јавната администрација преку искористување на можностите кои ги нудат информатичките и компјутерските системи, при што беа разгледани посебни реформи кои би можеле да најдат примена во двете земји.
На средбата беше разговарано и за спроведувањето на економските политики и механизмите за надминување на предизвиците од негативните економски текови во насока на обезбедување на услови за консолидација и економски раст и развој.