Премиерот Никола Груевски на третата конференција на иселеничките организации која се одржува во Скопје им оддаде признание на иселениците од Европа, Австралија и Северна и Јужна Америка за зачувување на врските со својата држава, на зачувувањето и промовирањето на националниот и културниот идентитет на Македонците во светот.
„Македонската дијаспора претставува значаен и нераздвоен дел на секоја држава. Вашата истрајност во негувањето, развивањето и афирмацијата на македонскиот национален, културен, јазичен и духовен идентитет го потврдивте во повеќе наврати преку вашите активности во бројните здруженија, црковните општини, културни друштва, хуманитарни организации, спортски клубови, играорни друштва и слични организации.
– Тие повеќе од сите други сведочат дека чувството за македонските корени не е ниту малку заборавено, напротив дека е широко распространето насекаде низ светот каде живеат Македонци, истакна премиерот и додаде дека негувањето и унапредувањето на врската на Македонците од дијаспората со својата татковина, како и нивната инволвираност во развојот на земјата се едни од најзначајните интереси и приоритети на Владата“, рече Груевски.
Груевски ги повика ислеениците да инвестираат во Македонија посочувајќи ги реформите што Владата ги презеде за да ја подобри бизнис-климата.
„Очекуваме вие да најдете цврст економски бизнис-интерес во таквите проекти. На наша страна е да создадеме соодветна бизнис-клима. Емотивната страна во сето тоа треба да биде, условно да кажеме, некој вид катализатор. На ваша страна тоа да биде исполнување на желбата да бидете во што е можно потесен контакт со татковината“, се обрати пред дијаспората премиерот Никола Груевски.