Македонија годинава е рангирана на 22. место од 180 држави на листата на годишното истражување „Дуинг бизнис“ на Светска банка. Според истражувањето Македонија остварила значаен прогрес во неколку од полињата и затоа го подобрила својот генерален ранг за 12 позиции.
Највисоко позиционирање, земјава има во категоријата „отворање бизнис“ и тука е рангирана на 6-тото место, едно пониско од минатата година кога беше петта.
Според истражувањето Македонија бележи напредок за 86 места кај издавањето и добивање дозволи за градба. Годинава земјава се најде на 61 место за разлика од лани кога бевме на 147 позиција во оваа категорија.
Има подобрување и кај регистрирањето на имот и кај пристапот до кредити.
Најлошо е рангирана кај енергетиката, што ги опфаќа процедурите за снабдување со електрична енергија и приклучување на мрежа за секој нов бизнис. Тука Македонија е рангирана на 121-та позиција
Според ранг-листата во категоријата „заштита на инвеститорите“ Македонија годинава има пад за само едно место и е рангирана на 17 позиција. Кај даноците има пад од 2 места и годинава во тој дел Македонија е рангирана на 26-тото место и повторно има висок пласман.
Единствена категорија кај која анкетираните покажале дека нема промени е „справување со солвентноста“, и тука е задржана 55-та позиција.