Вчера во Скопје се одржа состанок на Бизнис клубот во општина Гази Баба на кој присуствуваше Директорот на Агенцијата за странски инвестиции и промоција на извозот на РМ, Дарио Николовски. Заедно со членовите на Бизнис клубот, претставници на најголемите компании од општината, Алкалоид, Пивара Скопје, Макстил, Промес, Виталиа и многу други, дискутираа за развивање на многу аспекти од интерес на деловниот сектор на РМ.
Агенцијата работи во насока на обезбедување на странски директни инвестиции но и промоција на извозот, со што ќе се поттикнува економскиот раст и развој во Република Македонија. Во таа насока се и новите мерки на Владата на РМ за поддршка на малите и средни претпријатија како и промоција на извозот, а општината Гази Баба работи активно на тоа поле преку овој Бизнис клуб.
„Унапредување на инфраструктурата, промоција на локалната екомомија, поддршка и интернационализација на компаниите од оваа општина како и пренесување на искуства и know-how за поголем успех на компаниите на странските пазари и на домашниот како добавувачи на странските инвеститори е она што е од заеднички интерес на јавниот и приватниот сектор и ние ќе продолжиме да работиме за оставарување на тие заеднички цели.“– изјави Николовски.
Бизнис клубот е формиран со цел општината да има поблиска комуникација со бизнис секторот, и од него да произлезат конкретни предлози и идеи за заедничка соработка.