Цените на нафтата денес повторно силно пораснаа откако американската воена команда објави блокада на иранските пристаништа, а мировните преговори меѓу САД и Иран завршија без резултати во саботата.
На лондонскиот пазар, цената на барелот Брент скокна за повеќе од 7 проценти, на 102,15 долари, додека на американскиот пазар, барелот порасна за повеќе од 8,5 проценти, на 104,90 долари.
Остриот скок на цените следеше по најавата на Централната команда на САД (CENTCOM) дека на 13 април во 10:00 часот по источно време ќе започне блокада на целиот поморски сообраќај што влегува и излегува од иранските пристаништа.
„Блокадата ќе се спроведува непристрасно против бродовите на сите земји што влегуваат или излегуваат од иранските пристаништа и крајбрежните области, вклучувајќи ги сите ирански пристаништа во Персискиот Залив и Оманскиот Залив. Силите на CENTCOM нема да ја попречуваат слободата на пловидба за бродовите што минуваат низ Ормутскиот теснец до и од неиранските пристаништа“, се вели во соопштението на CENTCOM.
Во неделата, американскиот претседател Доналд Трамп ја објави блокадата, откако не беше постигнат договор меѓу американските и иранските преговарачи за прекин на војната во Исламабад во саботата.
Цените на нафтата, според тоа, повторно се на нагорна траекторија, откако нагло паднаа минатата недела благодарение на договорот меѓу САД и Иран за двонеделно примирје.
Минатата недела, цената на барелот падна за 12,7 проценти на лондонскиот пазар и за 13,4 проценти на американскиот пазар. Тие најмногу паднаа во среда, со двоцифрени стапки, веднаш по веста за договорот за прекин на огнот.