Македонскиот филм „Златна петорка“ во режија на Горан Тренчовски освои бронзена сабја од стручното жири во категоријата играни историски филмови на 8. Меѓународен фестивал за историски и воени филмови кој се одржува во Варшава.
Филмот се натпреваруваше во официјална конкуренција со 70 други филмски остварувања од 18 држави.
Поради неможноста режисерот и неговиот тим да присуствуваат на Гала церемонијата по повод доделување на наградите, наградата ја прими вршителот на работи во Амбасадата на Македонија во Полска Горица Атанасова Ѓоревска.
Како што истакна во обраќањето Атанасова Ѓоревска „Златна петорка“ е еден од најнаградуваните и најгледани македонски понови филмови, кој раскажува едно трагично сведоштво од македонската историја пренесено преку слободната уметничка интерпретација.
– За Република Македонија е многу значајно учеството и наградата за македонски филм при првото учество на реномираниот полски фестивал со што се градат нови културни мостови меѓу двете држави, навела Атанасова Ѓоревска.
Меѓународниот фестивал за историски и воени филмови во Варшава беше отворен вчера, а ќе трае до 26 октомври.