Бојан Трајковски еден од носителите на играта на кошаркарската репрезентација на Македонија, пласманот на Европското првенство 2015 им го посвети на претставниците на клубовите кои инсистираа на зголемување на бројот на странски кошаркари во пресрет на новата натпреварувачка сезона.
– Би сакал јавно да ги поканам сите оние претставници на клубови кои не ни веруваа дека ќе играме на ЕП да дојдат со нас и да не гледаат. Исто така, сакам да порачам до челните лица дека би можеле уште еднаш да го зголемите бројот на странци, со образложение дека домашните играчи немаат доволно квалитет. Епа ете, токму омаловажените играчи од домашното првенство пред почетокот на квалификациите, сега се изборија за посакуваното Европско првенство, изјави Трајковски на средбата со новинарите.
Трајковски кој својата кариера ќе ја продолжи во Полска, иако квалификациите ги заврши како најдобар стрелец во Македонската репрезентација со вкупно 68 постигнати поени (11,3 по натпревар), сепак, пласманот на Евробаскетот го оцени како успех на целиот колектив.
– Задоволен сум како одигравме во овој квалификациски циклус и остварените пет победи на шест меча. Ова не е успех на поединци, туку успех на целиот тим кој се бореше за победа на секој меч и го даваше својот максимум, дополни Трајковски кој со 32 скокови (5,3 по натпревар) беше втор скокач во нашиот тим по Ричард Хенркс.