Франција денес ја потврди својата посветеност кон своите нордиски и балтички сојузници, тврдејќи дека Русија „се соочува со пораз во Украина“ и обвинувајќи ја Москва дека продолжува да ги провоцира соседните земји и покрај нејзините неуспеси на бојното поле, пишува Анадолу.
„За време на видео конференцијата со нашите нордиски и балтички партнери – Данска, Естонија, Финска, Исланд, Латвија, Литванија, Норвешка и Шведска – ја потврдив француската солидарност и непоколебливата посветеност на нивната безбедност“, објави францускиот претседател Емануел Макрон на социјалната мрежа X по состанокот со лидерите на тие земји.
Тој потврди дека војната во Украина ги разоткрила границите на територијалните и стратешките амбиции на Русија. „Русија се соочува со пораз во Украина. Ова ја покажува залудноста на нејзините територијални и стратешки амбиции. И сепак, таа продолжува да ги провоцира своите соседи во обид да излезе од ќор-сокакот“, рече Макрон. „Ќе останеме заедно“, додаде тој.
Нагласувајќи го придонесот на Франција кон регионалната безбедност, Макрон посочи на распоредувањето на француски трупи во Естонија и Романија и улогата на Париз во активностите на НАТО за надзор на воздушниот простор во Балтикот.
„Нашата посветеност е особено очигледна во француското воено присуство во Естонија и Романија, нејзиниот придонес во мисијата на НАТО за надзор на воздушниот простор во балтичките држави, како и во билатералната соработка, договорите и партнерствата на Франција со земјите во регионот“, рече тој.
Макрон ја повтори долгорочната поддршка на Франција за Украина, нагласувајќи дека политичката, воената и другата помош ќе продолжи „за да може да се спротивстави, да победи и да преговара од позиција на сила, со поддршка на Европејците“.
Од почетокот на војната во февруари 2022 година, Франција е меѓу водечките европски сојузници на Украина, обезбедувајќи му на Киев воена опрема, финансиска помош и дипломатска поддршка.