Чаби Алонсо (44) постигна целосен договор за преземање на Челси и ќе стане нов тренер на лондонскиот клуб, пишува „Атлетик“.
Шпанскиот стручњак го посети Лондон на почетокот на минатата недела и ја прифати понудата, а четиригодишниот договор моментално се финализира и наскоро се очекува официјално соопштение, открива угледен спортски медиум.
Алонсо беше главна цел на Челси од самиот почеток, а тренерот на Реал Мадрид беше отворен за преселба на „Стемфорд Бриџ“.
„Атлетик“ во понеделникот објави дека клубот бара начин да го потпише Алонсо како постојан наследник на Лиам Розениор, а до неодамна тренерот на Борнмут, Андони Ираола, исто така, се споменуваше како сериозен кандидат.
Прославениот поранешен играч од средниот ред на Шпанија, Ливерпул, Реал и Баерн е без работа откако беше отпуштен од Реал Мадрид во јануари, само седум месеци откако потпиша тригодишен договор минатото лето. Алонсо пристигна во Кралскиот клуб откако во сезоната 2023/24 го предводеше Баер Леверкузен до историската, прва титула во германското првенство, без ниту еден пораз во домашните натпреварувања.
Иако Реал победи на десет од првите 11 натпревари во Ла Лига под негово водство, вклучувајќи го и Ел Класико на 24 октомври, тие на крајот завршија четири бода зад шампионот Барселона, од која загубија и во финалето на шпанскиот Суперкуп.
Алонсо се враќа во Премиер лигата, каде што за време на својата играчка кариера помина пет години во дресот на Ливерпул, со кој ја освои Лигата на шампионите во 2007 година. Челси се раздели од Розениор на 23 април, по помалку од четири месеци на клупата.