Комбе удри во безбедносна барикада во близина на Белата куќа во Вашингтон утрово, потврди локалната полиција.
Инцидентот се случи во 6:37 часот по локално време на раскрсницата на авенијата Конектикат и улицата Х.
Возачот е приведен и никој не е повреден, објави NBC.
Метрополитенската полиција (MPD) објави дека нивните полицајци се на терен за да ѝ помогнат на Тајната служба на Соединетите Американски Држави. Тајната служба соопшти дека возачот е испрашуван.
„Членовите на униформираната дивизија на Тајната служба истражуваат сомнително возило. Возачот е приведен и е испрашуван. Различни патишта и улици се привремено затворени додека нашите екипи си ја вршат работата. Ќе објавиме повеќе информации откако ќе добиеме нови информации од полицајците подоцна во текот на денот“, се вели во нивното соопштение.
Поради тековната истрага, властите привремено ја затворија Белата куќа, неколку околни улици, вклучувајќи делови од авенијата Њу Џерси.