Вчера во Соединетите Американски Држави беа откажани близу 4.000 летови пред зимската бура која веќе им го прекина снабдувањето со електрична енергија на илјадници клиенти дури до Тексас на запад и се закани да ги парализира источните држави со обилни снежни врнежи.
Метеоролозите изјавија дека снег, лапавица и замрзнат дожд, придружени со опасно ниски температури, ќе ги погодат источните две третини од земјата денеска и следната недела.
Нарекувајќи ја бурата историска, претседателот Доналд Трамп вчера одобри прогласување на федерална катастрофа за Јужна Каролина, Вирџинија, Тенеси, Џорџија, Северна Каролина, Мериленд, Арканзас, Кентаки, Луизијана, Мисисипи, Индијана и Западна Вирџинија.
„Ќе продолжиме да ги следиме и да останеме во контакт со сите држави на патот на оваа бура. Останете безбедни и стоплете се“, напиша Трамп во објава на неговата мрежа Truth Social. Неколку држави и округот Колумбија прогласија вонредна состојба поради временските услови.
Националната метеоролошка служба на САД предупреди на невообичаено голема и долготрајна зимска бура која ќе донесе широко распространета, голема акумулација на мраз во југоисточниот дел на САД и би можела да има „разорни до локално катастрофални последици“.
Метеоролозите предвидуваат рекордно ниски температури и опасно студени ветрови. Повеќе од 8.800 летови во САД, првично закажани за денес, исто така се откажани, според веб-страницата за следење на летови FlightAware.