Јапонските власти издадоа предупредување за цунами за префектурата Ивате откако силен земјотрес со јачина од 6,7 степени според Рихтеровата скала го погоди североисточниот дел од земјата.
Според Јапонската метеоролошка агенција, можни се бранови високи до 1 метар по должината на брегот на Ивате. Се апелира до граѓаните да се придржуваат до сите безбедносни мерки и да ги следат упатствата на надлежните служби.
Земјотресот е регистриран во 17:03 часот по локално време, а епицентарот бил во морето, покрај брегот на Јапонија.
Во градовите Мориока и Џахаба, земјотресот имал интензитет од Шиндо 4 според јапонската скала, која ја мери јачината на земјотресот според нивото на чувствителност на површината.
Засега нема информации за поголеми материјални штети или повредени, но спасувачките служби се во состојба на готовност, додека ситуацијата внимателно се следи.
Јапонските власти уште еднаш ги предупредија жителите на крајбрежните области да не се приближуваат до брегот и да ги следат понатамошните најави од метеоролошката агенција и локалните власти.